Амжилтын тухай

Энэ удаа блог уншигчиддаа амжилтанд хэрхэн хүрэх зөвлөгөөг хүргэж байна. Гэхдээ энэ бол бэлэн жор биш гэдгийг хэлье. Ер нь тийм жор хаана ч байхгүй. Зөвлөгөө нь зөвхөн таны ажил үйлсэд өчүүхэн ч гэсэн тус нэмэр болох болов уу гэсэн найдлага дээр үндэслэсэн болно. Блог эрхлэгчдийн зүгээс оюутнуудад хэрэгтэй болов уу гэсэн зарим зөвлөгөөг цуврал болгон хүргэх болно.

Амжилт болгон зөвхөн эзнийхээ л бүтээл байдаг. Та бусдын бүтээсэн бүтээлүүдийг худалдан авч чадна, гэвч бусдын амжилтыг худалдан авч чадахгүй. Амжилтыг та өөрийнхөө хүч хөдөлмөрөөр бүтээхээс өөр аргагүй юм. Хөлс хүч зарцуулахгүйгээр босгосон нэг ч барилгыг та олж чадахгүй. Та хэзээ ч нойргүй хонож байгаагүй бол амгалан унтах өдрийг олж үзэхгүй.Хэрвээ та далайн ёроолд хэвтэх сувдан чулууг өөрийн болгохыг хүсч байгаа бол аюул тохиолдож болох гүнд шумбах эрсдлийг ч даван туулах хэрэгтэй юм.
Таны бичиж буй зүйлс маш энгийн байсан ч гэсэн Теодор Драйзерийн зохиолууд шиг мянга мянган хүн уншина гэж бичих хэрэгтэй. Маш энгийн зүйлийг ярьж байсан ч Мартин Лютер Кингийн илтгэл шиг бусдын санаа бодлыг байлдан дагуулна гэж бодох хэрэгтэй.

"Сэтгэ, амжилтанд хүр" номоос иш татав.

Амжилттай сурах 10 зарчим

1. Өөрийнхөө хүчинд итгэлтэй байх. Суралцах хүсэл эрмэлзэлтэй байж, мэдлэг эзэмших сонирхлоо хөгжүүлж ажилла. Өөрийнхөө хүчинд итгэхгүй байх шиг тийм гутамшиг гэж үгүй.
2. Анхаарлаа төвлөрүүл. Анхаарлаа ганц мөч л өөр зүйлд хандуулахад цааш суралцахад онц чухал зүйлийг өнгөрөөж, суралцах чадваргүй болоход хүрч болно. Хэрэв нэг л зүйлийг анхааралгүй орхигдуулбал түүнийгээ маргааш гэлгүй тэр дор нь мэдэж авч бай.
3. Сайн хөдөлмөрлөж, хөдөлмөрийг хайрлаж сур. Зохион бүтээгч Эдисоний "Шинжлэх ухаанд бүх зүйлийн 1 %-ийг авьяасаар, 99%-ийг хичээл зүтгэлээр бий болгодог" гэсэн үгийг санаж яв.
4. Суралцах тодорхой дэг журмыг баримталж, ажил амралтаа зохицуулж байх. Хүнд хөнгөн хичээлийн даалгаврыг сэлгүүлэн зохицуулж, өдрийн цагийн хуваарийг сайн бодож боловсруулан мөрдөж ажилла.
5. Бүх зүйлийг цээжлэх гэж бүү оролд. Ой тогтоолтондоо найдахын зэрэгцээ бие дааж сэтгэж сур. Сэтгэж ойлгосноор үзэгдэл юмсын учир шалтгаан, холбоог таниж мэднэ. Аль болохоор яагаад гэсэн асуултыг өөртөө болон бусдад тавьж байх нь зүйтэй.
6. Дүрслэн мэдрэх гэсэн чухал мэдрэмжээ ашиглаж сур. Уншиж буй буюу багшийн яриаг сонсож байх үедээ судалж байгаа зүйлийг амьд, тодоор дүрслэн сэтгэхийг аль болохоор хичээж бай. "Хүний үүрэг зөвхөн мэдлэгээр дүүргэх бус харин гал ноцоох оч байх ёстой" гэсэн үгийг санагтун.
7. Бие дааж суралцах чадвартай болох хэрэгтэй. Багш л толгойд хийгээд өгчихнө гэж хүлээж болохгүй.
8. Гэрийн номын сандаа хичээлийн хуваарь, цагийн хуваарь, ажлын схем, шаардагдах ном, сурах бичиг зэрэг өөрт хэрэгтэй гэсэн зүйлүүдээ аль болох өөртөө ойр, олоход буюу авахад хялбар тавьсан байх хэрэгтэй.
9. Өөртөө олж авсан мэдлэгийг хаана яаж хэрэглэхийг тогтмол эрж хайж бай. Бодлого их бод. Зохиож бай. Зөвхөн толгойгоороо биш гараараа ч бас ажилла.
10. Даалгавраа аль болохоор бага цагт их хүч энерги зарцуулж хийхийг эрмэлз. Бодлого бодох бэлтгэлд бэлтгэх, зохион бичлэг хийхэд урлаг шаардагдана. Түүнийг эзэмш.

Амьдралыг хялбарчлах 35 арга
1. Зөв юманд ач холбогдол өг!
2. Муу зүйл тохиолдоно гэдгийг мэдэж хүлээж авахад бэлтгэлтэй бай!
3. Ядарвал бага зэрэг ч байсан хамаагүй заавал амар. Эрч хүч тань сэргэнэ.
4. Ямар нэг ажлыг эхлэхээсээ өмнө чухам түүнийг хүсч байгаа үгүйгээ мэд!
5. Бидний хамгийн их хэрэглэдэг "үгүй", "тийм" гэсэн үгийг хэлэхээсээ өмнө сайн бод!
6. Дургүй, залхуутай санагддаг ажлаа хөгжилтэй болгож идэвхитэй байх арга зам ол!
7. Хамгийн их ачаалалтай үедээ хэдхэн хором ч хамаагүй зогсоож яг тэр үед байхыг хүссэн газраа бод!
8. Хийх хэрэгтэй, эсвэл мөрдөх хэрэгтэй гэж бодсон зүйлээ жижиг цаасан дээр тэмдэглэн харагдах газар тавь. Жишээ нь танд зөвлөхөд одоо "Өнөөдөр инээмсэглэл дүүрэн бай" гэж бичээд урдаа тавьчих.
9. Хэрэв танд ямар нэг таагүй явдал учирвал, яг одоо танаас илүү хүнд байдалд маш олон хүн байгааг бодож тайвшир.
10. Хийж чадахгүй гэж айж байна уу? Тэгвэл та өмнө нь чадаж байсан зүйлүүдээ бод.
11. Сонин сэтгүүл уншиж байхдаа таалагдсан жижиг хэсгүүдийг хайчилж аван цуглуул. Хэзээ нэгэн цагт хэрэг болдог юм.
12. Амьдрал хэт нэг хэвийн болсон юм шиг санагдаж байна уу? Тэгвэл хааяа урьд нь хийж оролдож байгаагүй содон, гэхдээ сайн сайхан зүйл хий.
13. Нэг өдрийг огт зурагт үзэлгүйгээр өнгөрөө!
14. Үргэлж үзэг, цаастай явж бай. Бичиж тэмдэглэх юм гарч магадгүй. Мөн өнгө өнгийн балаар бичвэл өөрт илүү хөгжилтэй болдог.
15. Нэг өдрийг зөвхөн өөртөө зарцуулж ямар ч төлөвлөгөөгүйгээр хүссэнээ хий!
16. Цүнх, ширээ, халаасандаа байгаа хэрэггүй зүйлүүдийг гаргаж хая! Илүү дутуу юм нүдэнд торохгүй бол сэтгэл санаа амар байдаг.
17. Амьдралаа хялбарчил. Хэтэрхий их юм цуглуулах нь ядраадаг. Жишээ нь өөртөө зөвхөн хэрэгтэй юмаа байлга. Шүүгээгээ ухаж өмсдөггүй хувцсаа гарга.
18. Тооцоо хийж бай. Бага зэрэг тооцоог өөрөө хурдан бодож тооцоолж байх нь тархийг чинь хурцалж, анализ хийх чадварыг сайжруулдаг.
19. Олон жил уулзаагүй нэг найзтайгаа уулзаж байна гэж төсөөл. Тэр найз чинь таны одоогийн байдлыг хараад юу гэж дүгнэх бол? Тэр үеэс хойш та ямар байдлаар өөрчлөгдсөн бол?
20. Өдрийн аль үед таны эрч хүч нэмэгдэж бас буурч байгааг тогтоож ажлаа тохируул!
21. Замбараагүй байгаа зүйлийг янзлах танд хэцүү санагдаж байгаа бол авсан юмаа үргэлж байх ёстой байранд нь тавьж бай!
22. Нэг чухал ажлыг мартахаас айж байгаа ч үргэлж хойшлуулдаг уу? Тэгвэл хамгийн түрүүнд түүнийг хийж дуусга. Санаа чинь амарна.
23. Цагт нь дуусгаагүй ажил бусад ажлыг ч хойшлуулж эрч хүчийг тань барагдуулдаг. Юуг ч хойшлуулаад хэрэггүй.
24. Даалгавар эсвэл тайлангийн ажлаа эрт эхэл. Хугацаа нь болоогүй ч гэсэн эрт эхэлсэн нь найдвартай. Учир нь юу тохиолдохыг хэн ч мэдэхгүй шүү дээ.
25. Өглөөд жимс юмуу, жимсний цэвэр шүүс уу! Сэргэг сайхан байх болно.
26. Байдлыг хурцдуулж бодсоны хэрэггүй. Энэ бол таны өөрөө өөрийгөө айлгаж байгаагаас өөр юу ч биш!
27. Найзууд, хамаатан садантайгаа харьцаагаа сайхан байлга! Тэдний тусламж хэрэг болох үе заавал гарна.
28. Хэрэглэхэд амар цүнхтэй байх хэрэгтэй. Танд зайлшгүй хэрэгтэй зүйлүүдийг багтаадаг мөн цэгцтэй байлгахын тул олон халаастай байх хэрэгтэй.
29. Дэргэдээ заавал сонин сэтгүүлтэй явж бай! Дараалалд зогсох үед өөр юм бодож тархиа сэргээх хэрэгтэй.
30. Биедээ хамгийн амар хувцсыг сонгож өмс. Холгодоггүй гутал, босч суухад зовоохгүй, анхаарлыг чинь сарниулахааргүй сэтгэлд амар хувцас сонго.
31. Бусдын үзэл бодлыг хүндэтгэж бай! Бусдаар хүндэтгүүлэх анхны алхам эндээс эхэлдэг.
32. Таны мөрөөдөл биелэхээргүй хол харагдаж байгаа бол эхлээд биелэх боломжтой зүйл мөрөөд.
33. Ямар нэг ажлыг эхлэх нь танд хэцүү санагдаж байгаа бол эхлээд дуртай ажлаасаа эхэл!
34. Хоббитой бол. Жишээ нь юм нэхэх, хүзүүний зүүлт хийх, зураг зурах нь таныг урлагт ойртуулахаас гадна өөртөө хүндэтгэлтэй болгодог.
35. Хүүхэдтэй цагийг хамт өнгөрөө! Тэдэнд үлгэр ярьж, тоглох нь хэсэг хугацаанд ч болов амьдралын хүнд хэцүүг мартуулдаг.

Бэлтгэсэн  Б.Гандулам.